ពិតជា កម្សត់ ណាស់ ! រ៉ ន ចាន់ ឌី ន ធ្លាប់ ដើរ រើស សំរាម មុន ក្លាយជា តារាចម្រៀង មួយ ដួង
រាជធានីភ្នំពេញ ៖ ខ្សែជីវិតមនុស្សម្នាក់ៗ គឺមិនដូចគ្នានោះទេ ដូចពាក្យគេតែងតែពោលថា យើងមិនអាចរើសកន្លែងកំណើតបានឡើយ តែយើងជាអ្នកកំណត់វាសនារបស់យើងនាពេលអនាគត។ តួយ៉ាងអតីតបេក្ខភាពនៃកម្មវិធីប្រឡងចម្រៀង The voice kid Cambodia កញ្ញា រ៉ន ចាន់ឌីន ដែលម្រិយមិត្តគ្រប់គ្នាធ្លាប់បានស្គាល់កញ្ញារួចមកហើយ តាមរយៈការប្រឡងកាលពីប៉ុន្មានឆ្នាំកន្លងទៅ គឺមានខ្សែជីវិតកំសត់ និងលំបាកតាំងពីកុមារភាពមកម្ល៉េះ។
បើតាមបទសម្ភាសន៍ជាមួយសារព័ត៌មានកោះសន្តិភាព កញ្ញា ចាន់ឌីន បានឱ្យដឹងថា ជីវិតពីកុមារភាពរបស់នាង គឺតស៊ូខ្លាំងណាស់ ត្រូវប្រឡូកការងារសឹងគ្រប់មុខ ក្នុងនោះសូម្បីតែពេលខ្លះនាងត្រូវដើររើសសំរាម ដើម្បីយកទៅលក់រកលុយជូនម្តាយ និងសម្រាប់ការសិក្សា។
ពោលក្នុងសម្លេងអួលដើម.ក កញ្ញា ចាន់ឌីន បាននិយាយថា នាងរស់នៅក្នុងគ្រួសារមួយដែលបានបែកបាក់គ្នាតាំងពីនាងនៅតូចក្រូចឆ្មាមកម្ល៉េះ។ កាលនោះ គឺឪពុករបស់នាងបានចាកចេញពីគ្រួសារតាំងពីកញ្ញានៅអាយុ៩ឆ្នាំ ដោយជីវិតនាពេលនោះពិតជាលំបាកខ្លាំង ណាមួយម្តាយកញ្ញាមានផ្ទៃពោះ ហើយឪពុកក៏បានចាកចេញពីផ្ទះ អាចរកសុភមង្គលក្នុងគ្រួសារមិនឃើញឡើយ គឺមានសម្បុកហើយនៅតែរងារ។
កញ្ញា ចាន់ឌីន ដែលជាក្មេងស្រីមានសម្បុរស្រអែមស្រស់ និងបច្ចុប្បន្នប្រែជាមានសាច់ឈា.មភ្លឺថ្លា បានបន្តថា បន្ទាប់ពីឪពុកកញ្ញាបានលែងលះគ្នា ជីវិតកញ្ញាដូចជាចកនៅកណ្តាលសាគរ គឺកញ្ញាជួបការលំបាកជាច្រើន ជីវភាពមានការខ្វះខាត ដោយកាលនោះម្តាយកញ្ញាបានធ្វើការរោងចក្រផង ចិញ្ចឹមកូនផង ចំណែកកញ្ញាវិញ ជួនកាលចេញពីរៀនដើររើសអែតចាយ ដើម្បីបានលុយទៅរៀនក៏មាន។
កញ្ញា រ៉ន ចាន់ឌីន ថា កញ្ញាបានទម្លាយមូលហេតុទាំងនេះ ដោយសារកញ្ញាចង់ជួបពុកជាខ្លាំង កញ្ញាមិនដែលខឹងនឹងឪពុកម្តងណាឡើយ ទោះបីជាពុកបានចាកចេញពីផ្ទះតាំងពីកញ្ញានៅតូចក៏ដោយ។ ចាន់ឌីន បញ្ជាក់ថា នាងយល់ថា រាល់ការលំបាកទាំងនេះ អាចនិយាយបានថា នេះជារសជាតិជីវិត ដែលវាធ្វើឱ្យកញ្ញាកាន់តែរឹងមាំជន្នះបាននូវការលំបាកមួយនេះ។
តារាចម្រៀងស្រីវ័យក្មេងរូបនេះ ក៏បានរំលឹកដល់អតីតកាលជូរចត់ថា នៅពេលដែលឪពុកម្តាយលែងលះគ្នានោះ គឺម្តាយរបស់កញ្ញាចង់គិតខ្លីផងដែរ ប៉ុន្តែក្រោយមកគាត់ក៏បានប្តូរចិត្ត ដោយសារតែគាត់គិតត្រូវ និងបានគិតថា នៅមានកូនតូចៗត្រូវចិញ្ចឹម ដូច្នេះការគិតខ្លីមិនមែនជាផ្លូវល្អនោះឡើយ។
ជាការពិតណាស់ បងប្អូនធ្លាប់តែឃើញស្នាមញញឹមរបស់កញ្ញា ចាន់ឌីន តាមរយៈការឡើងច្រៀងលើឆាកប្រគំតន្ត្រី ប៉ុន្តែមិនដឹងពីភាពលំបាករបស់កញ្ញាឡើយ។ រ៉ន ចាន់ឌីន ដែលមានទឹកដមសម្លេងពីរោះរណ្តំ សមនឹងបទមនោសញ្ចេតនា តែងតែបំពេរអារម្មណ៍ប្រិយមិត្តតាមរយៈបទចម្រៀងមរតកដើមជាច្រើន ត្រូវបានគេមើលឃើញថា ជាក្មេងស្រីដែលខ្លាំង និងតស៊ូក្នុងឆាកជីវិតមិនដែលចុះចាញ់ព្រហ្មលិខិតឡើយ។
កញ្ញា ចាន់ឌីន បានបន្តថា ខ្សែជីវិតនៅពេលដែលគ្មានឪពុកពិតជាលំបាក ដូច្នេះជាចុងក្រោយកញ្ញាមិនមានអ្វីច្រើនទេ គឺកញ្ញាគ្រាន់តែចង់អោយឪពុកម្តាយកញ្ញាត្រូវគ្នាវិញតែប៉ុណ្ណោះ ព្រោះគ្មានអ្វីដែលល្អជាសុភមង្គលនៅក្នុងគ្រួសារនោះឡើយ៕ អរគុណសន្តិភាព
