លោក យ៉ន សុផល ប្រធានវរៈការពារព្រំដែនលេខ៦០៩ និងលោក ចាន់ ដារ៉ា ប្រធានការិយាល័យសាខាគយនិងរដ្ឋាករប្រចាំច្រកទ្វារព្រំដែនអន្តរជាតិព្រៃវល្លិឃុបឃិតជាប្រព័ន្ធបើកភ្លៀងខៀវឲ្យក្រុមឈ្មួញដឹកទំនិញបង់ពន្ធនិងបង់ពន្ធមិនចូលយ៉ាងគំហុក?

09/11/ 2024

គយច្រកព្រំដែនព្រៃវល្លិ៍ និងវរៈការពារព្រំដែនលេខ៦០៩ កំពុងឃុបឃិតឱ្យមានបទល្មើសគេចពន្ធនៅច្រកព្រំដែនដើមស្នាយ ក្នុងស្រុកកំពង់រោទិ៍

ច្រករបៀងដើមស្នាយ នៅភូមិក្បាលត្រាច ឃុំថ្មី ស្រុកកំពង់រោទិ៍ ជាចំណុចឆ្លងដែនប្រើរថយន្តធំៗដោយមិនបង់ពន្ធដែលទីតាំងនេះស្ថិតនៅក្រោមការគ្រប់គ្រងរបស់លោក យ៉ន សុផល ប្រធានវរៈការពារព្រំដែនលេខ៦០៩ និងលោក ចាន់ ដារ៉ា ប្រធានការិយាល័យសាខាគយនិងរដ្ឋាករប្រចាំច្រកទ្វារព្រំដែនអន្តរជាតិព្រៃវល្លិ។ ក្រៅពីទំនិញឆ្លងដែននៅចំណុចខាងលើ ដែលសង្ស័យមិនបង់ ពន្ធយ៉ាងគគ្រឹកគគ្រេងនោះ រថយន្តដឹកទំនិញធំៗកំពុងបំផ្លាញផ្លូវក្នុងសហគមន៍នោះបណ្ដាលឱ្យខូចខាតយ៉ាងខ្លាំង។ ប៉ុន្តែសមត្ថកិច្ចស្ថាប័នជំនាញ ដឹងតែពីយកលុយឬឯអាជ្ញាធរមូលដ្ឋាន មិនមានប្រតិកម្មចំពោះការខូចខាតផ្លូវនោះឡើយ។

ឈ្មួញជនជាតិវៀតណាម យករថយន្តធុនធំខ្នាតយក្សប្រភេទវ៉េអងច្រើនគ្រឿង ឆ្លងដែនពីប្រទេសវៀតណាម ចូលមកដឹកទំនិញនៅក្នុងដីខ្មែរ សង្ស័យជារថយន្តដឹក ទំនិញគេចពន្ធ ដោយចូលមកផ្ទេរទំនិញនៅក្នុងដីខ្មែរពេលថ្ងៃរហូតដល់វេលាម៉ោង៦និង៥០នាទីព្រលប់ ទើបដឹកចូលទៅប្រទេសវៀតណាម។ ករណីនេះកើតឡើងនៅចំណុចដើមស្នាយជិតគម្រោងដីឡូត៍អមតៈ ស្ថិតនៅភូមិក្បាលត្រាច ឃុំថ្មី ស្រុកកំពង់រោទិ៍ ខេត្តស្វាយរៀង លុះដល់ម៉ោង៦និង៥០នាទីព្រលប់ ទើបដឹកទំនិញឆ្លង ដែនទៅប្រទេសវៀតណាម តាមច្រករបៀងដើមស្នាយ ដោយគ្មានសមត្ថកិច្ចជំនាញណាមករំខានឡើយ។